كلنا عندنا شوية اسئلة في فترة الامتحانات والكام شهر اللي قبلها خاصة ان الثانوية العامة سنة مصيرية وبعدها هتعرف مستقبلك فين ؟ بالرغم ان دا مش صحيح لان الشئ الوحيد اللي بيتحكم في مستقبلك هو انت عايز ايه واكبر دليل علي دا اغنياء العالم كلهم وصلوا لفلوس ونجاحات واختراعات عظيمة جدا في حين ان معظمهم متخرجش من جامعات اصلا وان معظمهم كان فقير جدا في بداية حياته بس كل اللي عملوه فكروا وامنوا انهم يقدروا يحققوا اللي هما بيحلموا بيه حتي لو الكل قالهم مستحيل.
عشان كدا لازم تعمل زيهم مهما كان مستواك مهما عملت من اول السنة دلوقتي همك الوحيد هو ثقتك في نفسك وايمانك بها وانك تقدر بس اعمل اللي عليك وامن بحلمك وانت باذن الرحمن هتحققه مفيش حاجة مستحيله
1.مشكلة التفكير في تاجيل السنة وعدم الثقة بالنفس
حل المشكلة بسيط جدا وهو هل اللي انت مقدرتش تحققه في سنه هتحققه في سنتين ؟ هل هتقدر تحققه وانت اصحابك شايفهم اللي في طب واللي في هندسة ورايحين الكليات وانت لسه رايح الدرس ؟ هل هتقدر تذاكر بنظرتك قدام نفسك ان الناس اللي دخلت الكلية دي احسن منك ؟ اكيد لا يبقي حارب واعمل اللي عليك وربنا هيوفقك وهتحقق حلمك
2.مشكلة انا مذاكرتش حاجة من اول السنة هل هلحق اذاكر دلوقتي
اه هتلحق متلحقش ليه ؟ انت تعرف تعمل المستحيل بس لو انت عايز متركزش مع كلام الناس ركز بس مع نفسك وكمل وابدأ من الصفر وانت هتوصل اه هتلحق تخلص المنهج كامل وكمان تجيب الكلية اللي بتحلم بيها بس امشي علي الطريق واتعب كتير وخليك فاكر ربنا لما قال ” ان الله لا يضيع اجر من احسن عملا ” محددتش في الاية وقت العمل دا امتي بس اعمل وشوف نتيجة تعبك مهما كان الوقت متأخر طالما لسه فيه قدامك فرصه
3. مشكلة التوتر وعدم الثقة بالنفس
المشكلة دي مالهاش حل غير انك تشجع نفسك كل يوم بجمله اكتبها علي باب اوضتك علي الحيطة علي ورقة قدام عينك في الرايحة والجاية اكتب جمله تقويك وتحسسك انك تقدر اكتب جملة للتفاؤل اكتب حاجة تدفعك لقدام وانت عقلك هتبرمج كل ما يقراها انه يقدر ومش هيستسلم ابدا.
لو عندك اي مشاكل تانية بتواجهك تقدر تسيبلنا تعليق اسفل هذا الموضوع واحنا هنرد عليك بالحل بتاعها في اقرب وقت باذن الله وضحنالكم النهاردة حل جميع مشاكل الثانوية العامة في فترة الامتحانات وما قبلها ياريت نكون افدناكم.